Liverpool dey plan run new contract give Curtis Jones, and dem wan settle am sharp-sharp. Di 24-year-old midfielder still get deal till 2027, but di Reds wan secure am with beta fresh agreement wey go make am lock down for Anfield longer.
Why E Make Sense?
Jones na homegrown player wey don climb through Liverpool academy levels reach first team. Di guy don play 185 matches for Reds across competitions and don score 19 goals.
Liverpool no wan repeat di Trent Alexander-Arnold saga wey almost waka go Madrid free-free, so dem dey focus on extend key players contract early.
How Curtis Jones Dey Perform?
Last season, Jones play 46 games under Arne Slot and help Liverpool win Premier League title. For dis 2025/26 season, e never really cement starting spot — one league start and three sub appearances. E play EFL Cup match against Southampton but dem sub am off for 57th minute.
Even though e dey useful, fans dey expect more goals and assists from am, especially as midfield guys like Gravenberch, Mac Allister, and Szoboszlai dey shine steady.
Other Contract Matters
Liverpool dey also reason new deal for Ryan Gravenberch. Under Slot, di guy don transform into strong holding midfielder.
Na him even set record as youngest Liverpool player to score and assist for Premier League Merseyside derby. New contract go reflect how im status don rise.
For defense, Ibrahima Konaté matter still dey ground. E get less than 12 months left for contract and e never sign new one. If Liverpool no act fast, dem fit lose am.
TPB Verdict
Offering Jones new contract make sense because e be part of di squad building for future, but e still need step up e game if e wan stand shoulder to shoulder with di top Liverpool midfielders.
Emmanuel aka Piers — our confirmed Liverpool fan — go dey nod say dis move dey wise. But even he go agree say Jones gats add more ginger and consistency if e wan justify di Reds trust.
