Gonçalo Ramos score 90th-minute winner wey give Paris Saint-Germain 2-1 dramatic victory over Barcelona for Champions League clash inside Estadi Olímpic Lluís Companys on Wednesday night.
Ferran Torres first open scoring for Barça inside 19th minute, but Senny Mayulu equalise before half-time. Just as e be like say the match go end draw, Ramos burst net late to carry full three points.
With dis result, PSG don collect six points from two games, while Barcelona remain on three. Considering say PSG miss plenty key players, dis win na proper statement for Europe.
TPB VERDICT
Chai, wetin finish be dis! PSG show dem big-game mentality even as key men no dey — no Dembélé, no Kvaratskhelia, no Marquinhos and co — still dem manage knack Barça for dia home.
Luis Enrique boys no gree tire, dem push till the last minute and dem collect reward. Barça defence for the ending weak wella, and PSG chop am clean.
Dis one no go define season for both sides, but na big reminder say PSG still remain machine. With dem solid midfield trio and two of the best full-backs wey dey ball right now, dem dey among favourites to defend the Champions League.
Barcelona vs PSG Highlights
19’ — Ferran Torres (Barcelona 1-0 PSG)
Torres use smart finish score after Marcus Rashford sharp pass set am up. Barça carry early lead.
38’ — Senny Mayulu (Barcelona 1-1 PSG)
Nuno Mendes deliver clean assist give Mayulu, and the young baller no waste time before he blast net equaliser.
90’ — Gonçalo Ramos (Barcelona 1-2 PSG)
Wetin a finish! Achraf Hakimi release Ramos with deadly through ball, the striker bury am neat to scatter Barça fans heart for last minute.
Man of the Match – Nuno Mendes
Mendes na wahala for left side. He assist Mayulu goal, win three tackles, control ball with 93% pass accuracy and still cage young star Lamine Yamal. Na why dem hand am man-of-the-match, though Hakimi sef deserve shout-out.
Barcelona vs PSG Match Stats
- Possession: Barcelona 47% – 53% PSG
- Shots: Barcelona 12 – 15 PSG
- Shots on target: Barcelona 3 – 7 PSG
- Corners: Barcelona 4 – 9 PSG
- Fouls: Barcelona 12 – 14 PSG
Wetyn Next?
Barcelona go shift focus back to La Liga, as dem go face Sevilla away on Sunday. PSG on dia own side go continue Ligue 1 campaign against Lille for Sunday night, as dem remain top of table for France.
