Barcelona head coach Hansi Flick don call all di tori wey dey talk say e fit waka from Camp Nou at di end of 2025-26 season “garbage”.
Di 60-year-old coach don show him skill last season, as e help Barcelona win La Liga and Copa del Rey, plus di Spanish Super Cup earlier this year.
Barcelona no too dey smooth so far this season, as dem dey second for La Liga table, five points behind Real Madrid, and dem don win only two of their four Champions League games so far.
Plenty people don dey talk say Flick dey unhappy for Camp Nou and fit leave at the end of di campaign. But di German coach, wey get contract till 2026-27, yan say na “more garbage”, according to journalist Alfredo Martinez.
Flick Reject Exit Rumours
After Barcelona draw 3-3 with Club Brugge for Champions League on Wednesday, Flick yan say e no go change him style of play.
“E no easy. We create chances, dem play well. Dem aggressive, like we expect,” Flick talk. “We na Barca, we gats play our football. We fit talk about changing everything, but I no be that kind coach. We go play according to our DNA. We no go dey defend for our own half, we go dey counter-attack to win 1-0.
“We no press well for midfield. If you no dey win duels, e dey hard for back line to defend fast players. We gats analyse everything, talk to players, and try do better. We fit defend for final third, but we go stick to our philosophy because we fit do better. Last year, di 1-0 goal fit don be offside small.
“But we wan play with our ideas. 3-3 no be di best result, but di positive thing be say we fit come back three times after dem take lead. Of course, we gats talk about am. Di way forward na to no change. We na Barca. Our football dey active, dey intense. With ball and without ball. We gats work on this. When everybody don return from injury, we go see how e go be.”
Laporta Confirm Say Flick Happy for Barcelona
Barcelona president Joan Laporta reject di claims say Flick fit leave next season too.
“I sabi say Hansi Flick dey very happy and excited say we don return stadium, wey go get capacity of 105,000 people,” Laporta yan before di Brugge game. “Di team dey improve, dey move up. On Sunday, all three forwards score, and we happy with di progress.
“We get some players wey dey miss, e no be excuse, but e dey reality. Dis absences don disturb our plans, but now di injured players dey recover, and we dey progress small small.”
Flick don manage 75 matches for Barcelona, with 54 wins, nine draws, and 12 losses, giving am 72% win rate.
Na wetin The Pidgin Blog don gather on top di tori.
