Umea FC, wey be club for Sweden Ettan Norra, don announce say dem don sign defensive midfielder Fredrick Godwin. Dem nak dis update for dia official website.
Fredrick sign contract wey go run reach the end of 2028 season for Sweden. Dis move mean say he don end him waka with Mjöndalen IF, wey be second tier club for Norway, where he spend just one season.
But as e be so, the waka never finish patapata because Fredrick still dey Nigeria dey wait for him work permit.
The time wey he spend for Norway, he play twenty-six matches for all competitions and he use 1,303 minutes for pitch.
Wetin Fredrick talk about himself
Fredrick talk say he be person wey dey work hard, he get discipline, he strong, and he be team player. He add join say he like to focus, do the simple things well, and help him team any way he fit. He also promise to always bring ginger and energy any time he enter field.
Wetin Umea Sporting Director talk
The sporting director of Umea, Adam Chennoufi, talk say:
“Fredrick be defensive midfielder wey dey cover ground well and he no dey give up. Even though he no too big, he be strong player wey dey ready for fight for ball, and he sabi play ball well too.”
African connection for Umea FC
Fredrick na the second African wey Umea sign recently. Before him, dem sign Zishim Bawa, one Zambian player wey dey play front, wey komot from Drogheda United for Ireland.
Small history be say former Super Eagles defender Gbenga Arokoyo and Frankline Okoye don play for Umea FC before.
Leave a Reply
You must be logged in to post a comment.