Newcastle United striker Alexander Isak don reportedly dey train alone after manager Eddie Howe banish am from di main squad.
Di Swedish striker don dey linked heavily with move go Liverpool, and reports talk say e don yan Newcastle say e wan go Anfield.
Isak no follow Newcastle squad travel go Asia for pre-season tour. Instead, e train alone for him former club, Real Sociedad.
Di Magpies striker come return to training on Monday, but Howe no gree with how e behave. Di manager blast am say e no act like team player while transfer gist dey fly up and down.
Howe No Dey Smile With Isak
Howe tell Daily Mail say: “You gats earn di right to train with us. This na Newcastle United. Player gats show say e dey part of team – you no fit just dey act anyhow. That one na part of wetin dey happen here.”
According to GIVEMESPORT report, Howe don back him talk with action as e tell Isak make e dey train alone for now.
Newcastle sef no go fit sign Benjamin Sesko again, as e dey near to sign for Manchester United. Di 22-year-old for be possible replacement for Isak, but this new wahala fit make things worse for di Swedish baller.
Liverpool Dey Smile As Transfer Boost Land
Even though Liverpool don spend almost £300m buy seven players, dem still get power to sign Isak with record fee.
Di Reds don submit official bid for di 25-year-old striker wey reach £120m plus add-ons, but Newcastle sharply reject am.
GMS report say Liverpool no go likely submit another big offer unless Newcastle show green light or open up to talk.
Di transfer matter fit drag reach end of di window, but dis latest update from Newcastle camp don give Liverpool serious hope.
Meanwhile, Liverpool dey try offload Darwin Nunez, and reports talk say dem don already reach agreement in principle with Al-Hilal to sell di Uruguayan striker.