Manchester United new oga for dugout, Ruben Amorim, don talk say e dey “really proud” of im players, even though dem knack Arsenal 1-0 for Old Trafford on Sunday.
Na small header from Riccardo Calafiori wey separate both teams, but the Red Devils still show ginger wey make their fans dey clap.
United dominate plenty parts of the match – dem create chances scatter, but na Arsenal keeper David Raya wey dey do spider-man level saves deny dem. Meanwhile, their own keeper Bayindir behave like person wey never chop breakfast as e mis-time corner ball wey lead to the only goal.
Amorim Dey Proud Of Im Boys
After the match, Amorim tell Sky Sports say: “I proud of the guys well. Dem brave, dem press high, dem play ball with confidence. Na different United be this compared to last season.”
The Portuguese coach even yarn say make fans no dey panic: “We go still dey improve. Today we be the better team sef. Sometimes set-piece dey do us shege but na rules of the game. We must adapt. We get players wey fit beat anybody for Premier League.”
Highlights Of The Gist
- United play with plenty swagger but no finishing touch.
- Arsenal use one corner chop win – Calafiori nod am in.
- David Raya be wall for post – deny Cunha and Mbeumo chances.
- Amorim dey proud say hin boys don upgrade from last season ginger.
Wetín Dey Next?
United go waka go Craven Cottage next weekend to face Fulham. After that, na League Cup clash with Grimsby Town dey wait dem before Burnley come Old Trafford later this month. Amorim go need turn all this fine play into real points sharp sharp, else fans fit begin para.
TPB Banter Verdict
Na so ball dey sometimes – you fit play like Brazil ‘02 but if you no score, na L you dey carry go house. Arsenal knack one corner, bag 3 points, and waka commot.
United fans fit dey vex, but truth be say Amorim don put small hope for their heart. As dem dey talk for street: “No be who fine play win match, na who sabi score.”