Liverpool star Mohamed Salah and Arsenal Women player Mariona Caldentey don carry the top award for di 2024-25 Professional Footballers’ Association (PFA) award ceremony.
Salah dey inside shortlist of six players wey include im Liverpool teammate Alexis Mac Allister, Arsenal’s Declan Rice, Chelsea’s Cole Palmer, Manchester United’s Bruno Fernandes and Newcastle United’s Alexander Isak.
Di Egyptian international finally emerge winner on Monday evening after PFA members vote. Dis award mean say Salah don turn di first player wey go ever win PFA Men’s Player of the Year three times – after e don win am before for 2017-18 and 2021-22.
Na Salah performance wey carry Liverpool win league crown ginger am reach dis level – e score 29 goals and drop 18 assists for 38 Premier League games under coach Arne Slot.
Caldentey carry Women’s Player of the Year
As Salah dey lift di men award, Arsenal new signing Mariona Caldentey collect PFA Women’s Player of the Year for her strong debut season wit the Gunners.
Caldentey beat her own teammate Alessia Russo plus Chelsea’s Erin Cuthbert, Manchester United’s Phallon Tullis-Joyce and Manchester City duo Mary Fowler and Yui Hasegawa collect di award.
Di Spain international knack nine goals and five assists for di Women’s Super League 2024-25 season. She still score eight goals for di Women’s Champions League wey help Arsenal lift di trophy for only the second time for their history.
Rodgers, Olivia Smith win young player awards
Aston Villa winger Morgan Rodgers carry di PFA Men’s Young Player of the Year after e beat names like Myles Lewis-Skelly, Ethan Nwaneri and Milos Kerkez for shortlist.
Rodgers finish last season wit eight goals and 11 assists from 37 Premier League matches – form wey also earn am England call-up.
Meanwhile, Arsenal summer signing Olivia Smith chop Women’s Young Player of the Year after her superb campaign for Liverpool before she join Gunners. Di Canadian international score seven goals for 20 WSL matches, beating Aggie Beever-Jones and Grace Clinton wey dey shortlist too.