As transfer window open this summer, Arsenal don start to run things like person wey forget him shopping list for house. Dem dey buy, dey chase players like say dem dey do market clearance. From goalkeepers to midfielders, even up to striker and wingers – dem wan scatter Premier League this season.
Make we break down wetin dey sup for Arsenal camp right now.
Kepa Don Land
First signing wey enter na Kepa Arrizabalaga, the former Chelsea goalkeeper. Arsenal snap am up for just £5 million. Dem say he go be backup to David Raya, but some fans dey reason say e fit even snatch number one shirt if e perform. You know say Kepa fit sabi one or two things with saves, especially for penalty shootouts.
Zubimendi Dey Bring Fire for Midfield
Dem no stop there. Next man wey enter na Martin Zubimendi, strong midfielder from Real Sociedad. Arsenal splash money—over £50 million—take bring am. Coach Mikel Arteta don dey eye this guy since last season. Dem say e go be like new engine wey go carry midfield go front and back. Zubimendi na baller wey sabi collect ball and still pass am with sense.
Nørgaard Join the Wahala
Arsenal still go knack deal with Brentford to carry Christian Nørgaard join the team. £10 million na im dem pay. This guy na real workaholic for midfield, e no dey tire. If ball loss, na him first go dive chase am. If dem wound Saka again, e fit help hold ground. Arsenal dey try balance strength and style for middle.
Striker Palava – Gyökeres Matter Hot
The hot gist now na about one striker wey dem wan carry like hot akara—Viktor Gyökeres from Sporting Lisbon. Arsenal don offer over £60 million plus add-ons to collect the guy, and Gyökeres self don carry him bag, say he no dey go back Sporting training. Guy say he don ready to wear red and white.
Sporting still dey price am high, but Arsenal no wan comot hand. Dem dey serious to land am before pre-season tour. This Gyökeres na striker wey sabi press, score, hustle, and e strong like okada man for Lagos traffic.
Eze and Madueke? Arsenal No Wan Hear “No”
No be only Gyökeres dey Arsenal radar o. Dem don also dey follow Eberechi Eze of Crystal Palace. Arsenal like the guy ball control and sharpness. If dem get am, midfield go be like club—full vibes.
Noni Madueke from Chelsea dey enter Arsenal eye too. Dem say personal terms don dey ready, na only money remain make Chelsea release am. Arsenal dey act like sugar daddy wey wan collect everybody girlfriend this window.
Who Don Waka?
No be only buy-buy Arsenal dey do, dem don also sweep some players commot:
- Tomiyasu contract don cut – bye bye
- Jorginho don waka go Flamengo
- Tierney don enter Celtic
- Marquinhos don japa go Brazil – Cruzeiro
- Nuno Tavares don waka enter Lazio
Dem dey use style reduce squad and free up bench space.
Arteta Plan: Balance Like Okro Soup
Arteta no wan repeat last season wahala. Him dey rebuild team like carpenter wey wan do furniture for wedding. Him don strengthen goalkeeper spot, midfield don get beef-up, and striker dey enter soon. If all go well, Arsenal go shake table for Premier League and Europe.
Transfer Maths
Dem don spend about £60–70 million so far. Dem recover small change from players wey waka—around £10 million. But Arsenal board no dey look money now, na glory dem dey eye. The kind balance and depth Arteta dey build na to give other clubs headache.
TPB Conclusion
Arsenal this summer dey behave like person wey enter market with N100k and still dey price groundnut. Dem no wan carry last. With the players dem dey bring and targets wey still dey waka, e be like say dem wan use this season chase all the trophies wey dem miss before. Just pray say injuries no go do gbas gbos again like last season.
Arsenal fans fit begin shine teeth—na serious football dem go see this next season o