Arsenal dey eye Juventus striker Dusan Vlahovic for surprise summer move, according to wetin journalist Rahman Osman talk.
TPB hear say di Gunners don already arrange meeting with Juventus wey go shele next week to discuss di chance of Vlahovic waka enter Emirates. Na as im future for Italy still dey shake anyhow.
Juventus wan offload Vlahovic wages wey heavy like trailer — dem talk say di baller dey collect £315,000 every week. Dem even dey consider terminate him contract make e for quick commot.
Reports still show say Manchester United dey reason di Serbian baller too, along with Brentford winger Bryan Mbeumo.
Arsenal Dey Eye Vlahovic – Cheaper Pass Gyokeres?
Dem dey talk say Arsenal dey see Vlahovic as cheaper backup plan to their first-choice target, Viktor Gyokeres. Sporting Lisbon dey demand €80 million (£69m) for Gyokeres head.
Even though Gyokeres self dey eye Emirates move, Arsenal never really gree with Sporting, so everything still dey drag.
Meanwhile, Vlahovic fit commot from Juventus before window close. Him dey reason European clubs only — as e don already turn down offers from Saudi Arabia.
Di striker even gree say e fit collect less money for next club, compared to that scary £315k-per-week salary wey e dey earn now.
Arsenal Summer Transfers Don Hot
Arsenal summer market dey move sharp-sharp now. Dem don announce deals for:
- Kepa
- Martin Zubimendi
- Christian Norgaard
Plus, dem don seal agreement to sign Noni Madueke from Chelsea for £52 million. Di winger go sign 5-year contract sharp.
Dusan Vlahovic Juventus Stats (2024/25 Serie A)
| Stat | Figure |
|---|---|
| Games | 29 |
| Goals | 10 |
| Assists | 4 |
| Goal-creating actions | 8 |
| Minutes played | 1,784 |
If Arsenal go really chase Vlahovic pass Gyokeres, na wetin we go soon know. But one thing sure — Arteta and him boys dey move wild for transfer market this summer. Stay tuned, TPB go run am hot!