E go be wahala-friendly match on Thursday as Arsenal go jam Tottenham for preseason North London Derby wey go shele for Kai Tak Sports Park, Hong Kong.
Arsenal don win all dia three matches this summer, including that hot 3-2 win wey dem knack Newcastle. Meanwhile, Tottenham still dey try find spark as dem last match na one kain dull 0-0 draw with Luton Town.
Wetin Don Happen So Far
After Arsenal finally announce say Viktor Gyokeres don join dem, e come be like say the team get ginger wey pass Red Bull. The whole stadium burst when dem show Gyokeres to the fans before dem face Newcastle.
But e no too easy. Newcastle first score through Anthony Elanga, but Arsenal bounce back as Mikel Merino score one and Alex Murphy mistakenly knock ball enter hin own net.
Newcastle come equalize again through Jacob Murphy, but Arsenal last-last collect the win after small boy Max Dowman hustle penarity wey Odegaard calmly score.
The 15-year-old Dowman don dey burst brain this preseason — confidence full hin body like say na hin be senior man.
Wit that Newcastle win plus two other friendly wins (including one secret one against Watford), Arsenal don dey on fire this preseason. Na Villarreal and Athletic Bilbao remain for the Emirates after this Hong Kong showdown.
Tottenham Own Side
Tottenham still dey unbeaten too, but dem never too shine. Dem first beat Reading 2-0, but when dem split squad to face Wycombe and Luton, both games end without win.
Wycombe match end 2-2 (na Pape Sarr score the two goals), and the Luton match na borefest 0-0 in front of 10,000 fans.
As if say that one no pain enough, news come break say Morgan Gibbs-White don renew contract with Nottingham Forest — another player dem dey eye don slip away.
Spurs go still play Newcastle for South Korea, and later face Bayern Munich wey go be Harry Kane reunion match. But right now, dem focus na to break the Arsenal curse wey don dey since 2021–22 season.
Team News
Arsenal fans dey ask just one thing: Gyokeres go debut or not? Arteta no wan talk too much, but the guy don dey train and fit play small mins.
Another new guy, Mosquera, fit also play after e miss Newcastle match. But Calafiori wey injure again last match go most likely miss out, and Gabriel Magalhaes plus Jurrien Timber still dey out too.
For Tottenham, six players no travel: Bryan Gil, Manor Solomon, Dejan Kulusevski, Radu Dragusin, Destiny Udogie and Kota Takai.
Youngsters like Mikey Moore, Alfie Devine and Dane Scarlett no follow too — dem dey arrange loan move.
But £55m signing Kudus dey available, plus captain Son Heung-min wey people dey talk say fit move MLS — but dat one no go happen now-now.
Possible Lineups
Arsenal XI:
Kepa; White, Saliba, Mosquera, Zinchenko; Nwaneri, Zubimendi, Rice; Saka, Havertz, Martinelli
Tottenham XI:
Vicario; Porro, Romero, Van de Ven, Spence; Maddison, Bentancur, Sarr; Kudus, Solanke, Son
Wetin We Predict
Arsenal 2-1 Tottenham
Na the first time wey Arsenal and Tottenham go play men’s North London Derby outside UK, and we believe say Arsenal go still carry this one.
Preseason match fit surprise person, but the kind squad depth wey Gunners get go help dem dominate once dem start to change players.