Ousmane Dembele fit no show face for di Ballon d’Or ceremony wey go hold Monday night, as PSG vs Marseille match don reschedule land di same day. Dembele, wey many see as favourite to carry di award, dey risk miss di moment of glory.
PSG just win dem first ever Champions League trophy last season, and Dembele na key man wey shine for Luis Enrique squad. But thunderstorms for France force Le Classique against Marseille move from Sunday to Monday. Kick-off na 7pm BST, wey clash directly with Ballon d’Or ceremony wey start 7:45pm.
Dembele Season: From Doubts to Favourite
Plenty people bin write Dembele off during him Barcelona days – just 24 La Liga goals in six seasons, plus critics talk say him no dey press enough. But for PSG, e be like say na new Dembele show. Last season alone, di winger score 33 goals and drop 13 assists in 49 games across competitions.
Beyond goals, Dembele turn beast off di ball too – pressing, tackling, running like machine. Na why many dey reason say if Champions League dey count plenty for Ballon d’Or votes, Dembele get am locked.
Lamine Yamal: Di Teen Prodigy Weh No Gree Hide
Meanwhile, teenager Lamine Yamal still get strong case. Di 18-year-old help Barcelona lift La Liga, plus guide dem reach Champions League semi-final. Yamal stats sweet – 18 goals, 21 assists across all competitions. Big boy numbers for small age.
Still, even with Yamal magic, some dey argue say Raphinha na Barca true MVP last season with 34 goals and 22 assists. But whether na Yamal or Raphinha, Dembele Champions League medal dey shine pass – and dat fit be di tiebreaker.
TPB VERDICT
Dembele dey favourite clear, but wahala be say he fit no dey ground to collect award. If e happen like that, na one kain awkward moment go burst. As for Yamal, him time dey – na matter of “when” not “if” for Ballon d’Or contention. Monday go clear di air.