Barcelona attacker Fermin Lopez don clear air say e no dey leave Camp Nou this summer, even though news dey fly say Manchester United wan sign am.
Last season, the 22-year-old Spain international play 46 matches for Barca, score 8 goals and give 10 assists. Rumour bin talk say Man United don drop around £69m offer for am, but Fermin don talk am straight after e score twice for Joan Gamper Trophy match against Como – e dey stay put.
“Barcelona fans fit rest, because I go stay here… I no dey leave Barca. The match na to boost confidence ahead La Liga start. The important thing be say the team do well,” na wetin Fermin tell reporters.
Barcelona no wan sell, Romano confirm
Even though Fermin no sure starter next season because competition for attack strong, Fabrizio Romano don yan say e no get anything concrete for the Man United talk.
According to am, Barca no wan sell, and the only way e fit happen na if Fermin go tell sporting director Deco and coach Hansi Flick say e wan comot.
Romano add say Barcelona trust Fermin, believe in am, and no wan shake their squad. As at now, Fermin never talk say e wan waka. Plus, any move go require special financial package wey make sense well before Barca go reason am.
Man United still dey find midfield, goalkeeper options
Man United still dey linked to some goalkeepers, including PSG man Gianluigi Donnarumma, but Manchester City dey lead that race.
United go only sign new number one if Andre Onana comot, which no too likely, though dem fit bring in backup keeper if Altay Bayindir go.
For midfield, Brighton player Carlos Baleba be their main target. United still get hope say deal fit happen before window close.
Baleba self dey ready to join, but Brighton dey talk say dem want around £100m for the Cameroon midfielder, wey City also dey monitor.