Liverpool no fit shake off dem poor form as Galatasaray knack dem 1-0 for Champions League group match wey happen for RAMS Park. Na Victor Osimhen penalty early for first half spoil show for Arne Slot men, wey play dull and lifeless ball.
After dem don lose to Crystal Palace for Premier League, Slot change him lineup – Salah start from bench, Szoboszlai shift enter right-back while Frimpong dey push from wing-back.
But na Szoboszlai wahala lead to the penalty as e catch Baris Yilmaz face inside box. Osimhen no waste time – slot the ball go center as Alisson dive wrong side.
Wahala come double for Liverpool as Alisson injury force am comot for second half, before Hugo Ekitike too pull hamstring. Even when VAR later cancel Konate late penalty, Reds no fit find equaliser.
Na so Galatasaray end dem eight-game Champions League home drought, while Liverpool blank for UCL group stage match for the first time since 2020.
TPB Verdict
Honeymoon don finish be that? Liverpool don dey show cracks tey-tey – careless passes, shaky defence and depending on late winners. Against Palace, dem dey lucky say na only one goal enter. Against Galatasaray, e for bad pass if the hosts finish dem chances.
Yes, Slot fit talk say rotation dey necessary, but with the kind expensive squad wey dey bench, excuses no get leg. Liverpool still play like say dem dey sleepwalk, and alarm bells dey ring louder.
Highlights
- 16th Minute (1-0): Szoboszlai foul Yilmaz inside box, Osimhen step up and smash penalty go middle.
- 89th Minute: Referee blow penalty for Konate clash with Singo, but VAR show say Galatasaray man touch ball first. Decision cancel.
Man of the Match – Baris Yilmaz
The Galatasaray winger worry Liverpool all night. Na him win the penalty, draw three fouls, win all seven ground duels and still defend well with tackles. Only goal no join him superb performance.
Match Stats
- Possession: Galatasaray 33% – 67% Liverpool
- Shots: Galatasaray 9 – 16 Liverpool
- Shots on Target: Galatasaray 4 – 4 Liverpool
- Corners: Galatasaray 3 – 7 Liverpool
- Fouls: Galatasaray 12 – 14 Liverpool
What Next?
Next Champions League game, Liverpool go travel go Germany to face Eintracht Frankfurt on October 22, same night Galatasaray go welcome Bodo/Glimt. But before then, Premier League get blockbuster – Liverpool vs Chelsea on Saturday. For Turkey, Gala sef go jam Besiktas this weekend.
