Arne Slot don talk say Liverpool gatz wait and hope say the injury wey Giovanni Leoni knack no too serious as e first look.
The Reds qualify enter the fourth round of the EFL Cup after dem beat Southampton 2-1 for Anfield on Tuesday night, but the win come with wahala.
Hugo Ekitike chop red card after e remove jersey to celebrate him late winner, while centre-back Leoni waka commot for stretcher inside second half with wetin fit be knee injury.
Slot yarn after the match say: “If player commot like that, normally no be good sign. As una fit understand, we gatz wait see wetin e be. But usually e no dey positive when player commot like this.”
Knee injury recovery fit take months, and as Leoni na just 18 years old, long time for sideline fit slow down him development.
Liverpool Squad Depth – Arne Slot Get Enough Options?
Slot dey see Leoni as backup for Virgil van Dijk and Ibrahima Konate, and the boy still dey behind veteran Joe Gomez for pecking order.
Wataru Endo get small experience for centre-back, and e fit slot in for cup games. But the wahala be say Konate and Gomez dey always get injury problem, so e no clear if Liverpool fit rely on dem throughout the season. Van Dijk still dey solid, but at 34 years old, e no fit carry backline load alone.
Marc Guehi January Move – Liverpool Fit Change Mind?
Liverpool don dey linked with Crystal Palace defender Marc Guehi, but dem no sign am deadline day because dem dey wait make him contract near expiry. If Leoni injury come serious, Liverpool fit gats rethink their January stance.
If dem reach far for Champions League and still dey inside domestic cups, e go hard make backline cope with too many matches if club no active for winter market.
TPB Take
This Leoni injury na big blow because the pikin still dey learn and grow. Slot no wan rush panic buy, but reality be say Liverpool fit need fresh legs for January. If not, na gamble wey fit cost dem trophies.
