Omo! Transfer gbas gbos still dey hot this week as report from Sky Italy don confirm say Juventus wan hold another round of gbajue with Manchester United about Jadon Sancho.
Dem say video call don dey set like Zoom church meeting, and the agenda na to find how dem go take carry Sancho go wear Juventus shirt sharp sharp. As we dey talk like this, Napoli still dey hover like stubborn mosquito on top the matter too.
From £73m to £25m? Na Big Discount Be That
Sancho wey Man United sign from Borussia Dortmund in 2021 for big boy price – £73 million – don now dey valued around £25 million. Make una clap for market depreciation . The guy still get one year left for him contract, but Red Devils dey look say make dem sell am outright instead of another loan waka.
Last season e go Chelsea on loan, even though e no turn water to wine for Stamford Bridge.
But Juventus believe say if dem no act fast, Napoli go collect the guy like black market fuel .
Napoli Vs Juventus – Sancho Transfer Na El Classico?
Napoli get Sancho for dem wing wishlist too – alongside Liverpool’s Federico Chiesa (yes, wahala dey). But if Sancho wan rock Napoli shirt, dem talk say e go need reduce him salary. Omo na pay cut wey go touch bone o .
Meanwhile, Napoli still dey eye Noa Lang from PSV, and dem say dem wan sign two wingers join. Another name for their list na Dan Ndoye from Bologna, but Bologna dey reason high price, Napoli dey reason Black Friday.
Dortmund Dey Monitor Ndoye Too
To add pepper to the soup, Dortmund – Sancho former club – dey eye Ndoye as replacement in case Jamie Gittens waka go Chelsea. Everybody dey shuffle wings like say na dancehall battle .
TPB Summary:
- Man United want sell Sancho – price: £25 million
- ⚪⚫ Juventus dey plan Zoom call to finalise deal
- Napoli still dey inside the transfer gist, but dem dey talk say Sancho gats collect pay cut
- PSV’s Noa Lang and Bologna’s Ndoye dey inside Napoli’s backup plan
- Dortmund dey wait like hawk in case Gittens move
E go happen or na still cruise? Drop your thoughts below . Who fit revive Sancho career pass – Juve or Napoli? Make we yan!