Manchester United don finally make decision on whether dem go appeal after dem shocking EFL Cup exit to League Two side Grimsby Town.
Last Wednesday, Ruben Amorim and him boys chop serious embarrassment as Grimsby knack dem comot through penalty shootout for di second round. Na one of di biggest upsets for United history and fans no gree keep quiet since.
Grimsby Rules Breach Wahala
Few days after di match, news burst say Grimsby actually break competition rules. Dem use ineligible player, Clarke Oduor, wey join on loan from Bradford City. Di registration enter system one minute and 59 seconds after di official deadline.
Even though di player no start, he come in as 73rd-minute sub for Blundell Park. For di breach, Grimsby don chop £20,000 fine, but FA still allow dem continue for di competition.
United Get Option To Appeal
According to BBC Sport, United bin get di chance to appeal di ruling if dem wan push am within five days. But as Sky Sports yarn, United hierarchy no wan drag di matter go further.
End Of Road For United EFL Cup Journey
As e be, di punishment no go pass di £20k fine and Grimsby go still face Sheffield Wednesday for round three. For United, e mean say dem don officially comot from EFL Cup and only Premier League matches remain for their schedule for 2025.
