Manchester United boss, Ruben Amorim, don yarn say him players “spoke really loud” with di kind poor performance wey dem show for EFL Cup defeat against Grimsby Town.
United waka comot from di competition in a very embarrassing way, as dem lose 12-11 on penalties after 2-2 draw with League Two side Grimsby. Na one of di biggest shocks for EFL Cup history.
Red Devils Collapse Against League Two Side
United bin dey trail 2-0 before dem force penalties. But na Matheus Cunha miss chance to win di shootout, while Bryan Mbeumo hit crossbar for him second penalty, give Grimsby di golden ticket enter third round.
After di match, Amorim talk say di players don already talk with di way dem take play: “In the end, e no matter say we recover or not, but na di signs wey di team give. I feel say di best team win tonight, na dem really dey for pitch.”
“Players Don Already Talk” – Amorim
When Sky Sports press am, Amorim insist say e dey clear wetin he mean. “Di way we take start without intensity, di pressing totally lost. I no need talk too much, di players don already talk really loud.”
Later for press conference, Amorim still maintain say Grimsby deserve the win pass United. “Everything spoil from start. We no even dey. For a club like ours, na big problem. I wan beg our fans, say sorry.”
Onana Wahala Again
Questions dey about goalkeeper Andre Onana wey contribute to both Grimsby goals. Even for penalty shootout, he only save one, while he dey dive wrong way or no fit strong hand ball away. But Amorim defend am: “E no be about Onana. Na whole team problem.”
Next Stop: Burnley – Must Win
United next match na against Burnley for Old Trafford on Saturday. Amorim dey under big pressure as dis fixture don turn to must-win, even though na early for di Premier League season.
United never taste victory yet for 2025/26 campaign, and di fans dey vex wella.
Amorim conclude: “We no fit change everything in one summer, but we gats no show this kind performance again. Something gats change, and e gats start this weekend.”