Manchester United co-owner Sir Jim Ratcliffe don talk say Ruben Amorim need at least three years to prove say e really be “great coach” for Old Trafford.
Amorim go soon mark one year for Manchester United come November 1, but the year wey e don spend no sweet like that. The guy don win only 19 out of 50 matches wey e don manage for all competitions, and e don carry just 37 points from 34 Premier League games.
But Ratcliffe no wan rush sack am. The man say e go give the Portuguese time to build the team proper-proper, same way Arsenal take give Mikel Arteta time when e dey struggle. Remember say Arteta finish 8th for him first two seasons before e begin dey chase title and finish 2nd for three of the last four campaigns.
“We No Fit Dey React Like Twitter People” – Ratcliffe Talk
As Ratcliffe dey yarn for The Business Podcast wey The Times and The Sunday Times produce, e talk say: “We gats get patience. We get long-term plan, this thing no be like switch wey you just on and off.”
E come add: “You no fit dey run Manchester United based on panic or one journalist wey go just dey rant every week. Amorim na good guy. I believe say e go need at least three years to show say e really be great coach.”
When dem ask am whether Amorim go actually get that full three years, Ratcliffe reply: “Yes, na where I stand be that. Football no be overnight miracle. Look Arteta for Arsenal, the guy suffer for the first two years but dem no throw am away.”
Amorim Still Dey Find Him Feet
Since Amorim take over from Erik ten Hag, e never still manage to win two Premier League games back-to-back. But him team just collect 2-0 win against Sunderland for Old Trafford last match, so small hope dey rise.
Next stop for The Red Devils na tough one, dem go face Liverpool for Sunday, October 19. Liverpool sef no too dey enjoy life right now as dem don lose three matches straight for all competitions. So, e fit be another mad one for both sides.
One thing sure, Ratcliffe no dey panic. The man dey play the long game, and for now, Amorim seat still dey warm but safe… for now.
