Dem say when wahala start e no dey wear shoe, na so the tori wey still dey fly for corner about Ghana midfielder Thomas Partey still dey shake table for social media.
As Arsenal fans dey jolly for im football skills, some people still dey remember wetin happen back for 2022, wey Thomas Partey enter one heavy gbege — rape allegation. Even though the tori no too loud again, people still dey ask, “Wetin really happen with Thomas Partey rape case?”
Make we break am down for pidgin.
Wetin Happen?
For July 2022, Thomas Partey wey dey play for Arsenal and Ghana national team enter hot soup. One babe accuse am say he rape her for UK. According to wetin leak for social media, the girl talk say she and Partey bin dey date and travel go Ibiza for vacation, and na for there she claim say e force her do wetin she no agree for.
As the matter drop, UK police begin investigate the mata well-well. Dem even go the footballer house go arrest am. But wetin surprise many people na say the case no ever reach court, and no official charge come out.
Police Reaction
Police bin confirm say dem dey investigate rape case involving one popular footballer, but dem no call name. Later later, many people begin put two and two together say na Partey dem dey talk about, based on clues wey leak online — like travel dates, Instagram photos, and even the girl own account.
Dem release am after some questioning, and Arsenal sef no talk anything serious. Partey even travel go US pre-season with the team that same period, wey cause serious gbege online as people begin para say the club dey support am or dey cover up.
Fans and Internet Reaction
Na that time social media scatter. Some people begin drag Partey like say tomorrow no dey, especially feminists and activists. Dem say if e really do am, make justice catch am. But Partey fans and some Ghana people begin defend am, say no be every accusation be true, and people dey lie for clout or money.
Dem drag Arsenal join the matter, say the club no suppose allow am dey play while police still dey investigate. But Arsenal bone the matter, dem no suspend am, dem just continue dey use am for match.
So Wetin Be the Result?
Up till today, the matter still dey hang like NEPA light. UK police no charge am, and e never go court. Some reports talk say the girl later withdraw the case or the evidence no strong. Others talk say Partey settle the matter behind closed door, maybe money or NDA involved, but that one na speculation, no concrete proof.
Partey never publicly talk anything about the matter, he just dey mind im business and play ball.
Moral of the Tori
This matter open many people eye say rape accusation no be beans. E fit spoil person career even if e no lead to jail. For Partey case, the wahala no reach court, but e still dey affect how people see am. Some fans no wan support am again, while some still dey cheer am for pitch.
E also show say for this life, make everybody dey careful — especially celebrities. Anything wey you do, fit come back bite you one day.
TPB Final Yarn
Whether Partey do am or not, na only God, the girl, and Partey know the real truth. But this kind issue dey remind us say women matter and consent no be joke. At the same time, we gats remember say accusation no be conviction. Na why evidence and justice system important.
For now, Partey dey ball like nothing happen. But the internet never forget.