Wahala dey o! Na five Manchester United players don yarn say dem no dey do again. The matter don enter street as Antony, Alejandro Garnacho, Tyrell Malacia, Marcus Rashford and Jadon Sancho all don tell the club say dem wan comot sharp-sharp this summer.
And as e be like this, Man United no get choice than to give dem small space make dem sort dia waka matter.
Who Talk Say Dem Wan Japa?
Reports don show say these five ballers no wan return now with the rest squad wey go start training on Monday. Instead, United don give dem extra July holiday – not because dem try o, but make dem use that time arrange dia transfer waka well.
If dem no fit settle the matter before time run out, dem go still return Carrington to dey train, flex medical, collect smoothie — everything still dey as per normal.
Rashford Fit Wear Another Jersey?
Wetin pain fans pass na say dem don even already dash Rashford’s iconic No. 10 shirt to Matheus Cunha! You dey reason am? No even wait for official goodbye!
Reports dey talk say Rashford still dey eye Barcelona, and he no ready enter any part-exchange package deal like small chops. He wan play Champions League ball but no wan relocate go London.
Guy don soft reach that level.
Sancho, Antony & Co Dey Market Too
Sancho own gist still dey boil. Juventus still dey run things behind the scenes make dem fit carry am go Italy. Chelsea bin owe United for him loan deal but dem pay £5m penalty to free demself from turning the deal permanent. United just dey reason £25m for am now.
Antony own case na telenovela. Baba talk say he “hit rock bottom” for Old Trafford but when he enter Betis on loan, e be like say dem pour water on dry garri. Brazil even call am back. Now e say na Betis he wan go back. Como show small interest but no be dem he dey eye. Even Bayer Leverkusen (where Ten Hag dey now) dey watch him like CCTV.
Garnacho Dey Cold
As for Garnacho, the pikin don dey vex small. After dem bench am for Europa League final and no put am at all for last EPL match vs Aston Villa, e don dey reason say maybe him time don reach to change jersey. Reports say Chelsea dey peep am from corner like guy wey dey toast babe but no offer yet.
Malacia: Comeback Turn Exit?
Tyrell Malacia wey spend last half season on loan for PSV after long injury, still dey among the five wey tell club “Oya Bye Bye.” Wetin the guy dey plan next never clear, but from the look of things, him heart don dey outside Man U.
Wetin Next?
As dem delay return date for the five players, all eyes go dey on transfer market to see who go carry Ghana-Must-Go leave Old Trafford. If all five go, na serious rebuild Arteta-style go remain for Amorim.
TPB Take:
Na serious exodus dey cook for Manchester United. Dem never even sign new players wey go make fans scream “Come on United!” and now dem dey wave goodbye to half dia squad.
Who dey follow rebuild? Who go chop benched life? Make we dey look as di tori dey unfold!