Chelsea don lift the Club World Cup trophy after dem beat PSG 3-0 for final wey shelle for New Jersey on Sunday. Cole Palmer shine as usual, but na goalkeeper Robert Sanchez steal the whole spotlight as e block everything like landlord for gate.
Sanchez Dey Para – Clean Sheet No Be Luck
People wey don dey yab Sanchez since say him no sabi, today dem shut up. The guy make six big saves, five of dem from inside box, and e make sure say PSG no see net at all.
One of him mad saves na double save for 17th minute when score still dey 0-0. Later again, he dive like fish block Vitinha wey wan spoil Chelsea lead.
“Na Cech Be This?” – Fans Begin Compare Am To Legend
Before this match, many Chelsea fans no too rate Sanchez. But after this final? Dem begin compare am to Petr Cech, even dey post meme wey put helmet for him head like say na him be new legend.
Cech na Chelsea icon wey don win Champions League and 4 Premier League titles. Even though the comparison dey joke small, e show say Sanchez don win back fans for just 90 minutes.
One fan even talk say Joe Biden wey watch the match go carry go house say Sanchez na best keeper for world.
Chelsea Eye Donnarumma, But E Get As E Be
Reports from France dey talk say Chelsea dey eye PSG goalkeeper Donnarumma, especially as their talk with AC Milan about Mike Maignan no work.
Dem say Chelsea gree pay €21m for Maignan, but Milan no gree. Now dem dey look Donnarumma side. But no be confirmed talk yet – and PSG go ask for big money if dem wan sell am.
Chelsea no dey new to this kind thing sha – na dem hold record for most expensive goalkeeper (Kepa, £71.6m from Bilbao).
But as e be now, Sanchez don prove say him deserve that no. 1 shirt. This performance fit even make Chelsea rethink transfer plan for goalkeeper.